السلام عليكم ورحمة الله وبركاته
واخباركم وانتو بخيرات
المغازل بين الأمس و اليوم و عقب بكرا
موضوع يهم كثير من الشباب وبعض ((البنيات )) الي توهم طايحين في المغازل و فرحانين بأنفسهم يحسبون انهم بيدخلون التاريخ من أوسع أبوابه بحركاتهم النص كم ذي , ما يدرون إن المغازل قديم قدم التاريخ نفسه
منذ قديم الأزل ( متعوب عليها ذي ) و هم عارفين المغازل و حركات اللكاعه و كلنا نعرف قصة ليلى و مجنونها قيس اللي لاعبن على الناس كلها و مسوي فيها مجنون و هو يهبل بديرة , طبعا اللي ما تعرفونه إن كان مسوي عمره مجنون عشان ذيك الأيام كان فيه تجنيد إلزامي عندهم في قبيلتهم و هو يبي يفتك ماله خلق حرب و ما حرب
و تطور الغزل عبر السنين ( صورة شريط يمر بسرعة )
حتى وصل لوقتنا الحالي و تحديدا هالثلاثين سنة الماضية و طاحوا الشباب بحركات جديدة ولو إن فيها دلاخه شوي مثل اللي يدق على بيت جيرانهم و يقول وين صالح ؟؟ , ياخي استح على وجهك داق على الجيران و هم عارفين اسمك إلى خامس جد و لا في الرياض تلفونات إلا في ثلاثين بيت و تقول وين صالح ؟؟ .. عاد بعضهم مسوي ذكي و تلقاه قانص البنت و هي طالعتن تكب الزبالة ( كرمتوا ) بشيلتها و حاسب لها دقيقة نص لين توصل لصالة بيتهم همن يدق عاد اخبر لكم واحد كان يدق من من المقلط و هو فاتح الدريشة يتسمع وش بتقول البنت اذا صكت السماعة ( هي بتمدح اسلوبه و و كذا ) ما درى الا ام الجيران لاقطتن بشتها و جايتن تعلم امه عليه
و لا يفوتني الموقف الذي أذهل البشرية جمعاء يوم ذاك المنسم راح يرقم في شارع جرير و تكللت مساعيه بالنجاح ويوم عطى البنت الرقم قالت له " خويلد !! والله لأعلم أمك عليك يا الهيس " فرد بكلمته التي سجلها التاريخ " خالتي !! تراني عارفس قسم بالله "
و مرت سنين
و طاحوا بحركات الترقيم في شارع العصارات و الدوران بالسيارات و الترقيم بالأشرطة اللي فيها منوعات , و من المواقف اللي صارت لواحد اعرفه رمى شريط كاتبن رقمه عليه على بنت فاتحه الشباك له ( معجبها الولد في البداية ) و كانت الظاهر أول ترقيمه له , عاد من زود الحماس الشريط انطلق من يده يمشي مليووون ما رده إلا جبهة البنت ثلث ساعة و هي تدق و تلعن اسقافه ( شكله مرقمها بشريط فيديو ) , و في ذيك الفترة طلعت حركات المسج و اللي يحطون فيه أغاني و منوعات و مدري وش , اللي يحط صوت صفارة إنذار أيام الأزمة ( منسم ) و اللي يحط موسيقى و شعر بزعمه رومانسي
و مرت سنين و سنين و سنين
و طاحوا باللوحة مدري المعروض و تعال تفرج على المواقف البايخه , اللي يوزي المعروض تحت الدعاسة و بعضهم ينساه في الدرج في موتر أبوه و إذا انكفش يصرفها يقول هذي صحيفة للمدرسة , الاستاد يقول كل واحد يكتب رقم بيتهم عشان نشوف براعتكم في الخط ( امحق تصريفه ) و اللي يقول ناوي اوقف السيارة في مواقف السيفوي ابي ابيعها ( المشكلة توه شاريها من اسبوعين )
و مرينا بسرعة على فترة " اشحن سوا و نطلع سوا " ( و الهيئة كفشتهم سوا )
و مرت سنين و سنين و سنين و سنين
و جانا البلوتوث و برجس و طقته , ياخي مخترعينه عشان الاتصالات و ثورة المعلومات و التقنية و حنا ما نعرف الا الوجه الداشر من اي تقنية بس برضه يحسب لنا إننا أول شعب رقم بالبلوتوث
و بتمر سنين و سنين و قرون و قرون و قرون و بنشوف تطورات في الترقيم و هالحركات
عاد تدرون إن الله رحمنا بأشياء واجد و بأعطيكم أمثلة
يعني لو اول رائد فضاء وصل للقمر كان رائد فضاء سعودي , تتوقعون بيحط علم السعودية و يقعد يصور جنبه !! صفقوني إذا ما كتب رقمه على لوحة و بخط عريض و لو تدور في بدلة الفضاء حقته بتلقى الجوال جايبه معه ( عاد ما مسويها إلا دلخ من جد ) اصلا ما فيه شبكة على سطح القمر و بتلقى الأبراج بالسالب
<<<<< من طقة اللي يسوونها
و تخيل ان اللي مسوي العملية حقت فصل التوأم كان دكتور راعي غزل , كان تلقاه كاتب رقمه بيمكروكروم على بطن التوأم
و ظنتكم وش بيصير لو مخترع التلفون كان سعودي بدال جراهام بل !!!! , 100% كان بيخلي التلفونيحول اتصال أي بنت على بيتهم ( والله يا تلفونه مهوب ساكت ابد )
وعلى الله يعجبكم
(عجبنى ولطشته)
المغازل بين الامس اليوم وبعده 
العرض العادي
